قایناق: http://www.qapqara.blogfa.com/
آرش ساعي
1
....
دئمک
یئنه ده بیر دؤنوش
بیر قاییدیش
تملسیز دؤور ،
ساییسی :
1 – دن تانری اؤاومونه دک
آجی لار ائنینده
قارانلیق لار بویوندا
یاشام مساحتلی
اؤلوم حجمینده
بیر شئی ،
آچیلیب – باغلانمیش
دییافراگم کیمی
سانکی کیپریک یاشاماسی ؛
یعنی
دوروم – دوروم
تانری لارا قوربان وئریلمکدییک
دوعالار کیمی بیر شئی لرله قانیمیزدا . . .
سونوج
یونله ریک آغیر آغری دوروم لاریندان
ساری ایلان لار سوروسونه ساری . . .
اینان
ماس – ماوی لیک لر آلار جانیمیزی .
آی ! منیم ائکیز قارینداشیم
ندنسیزلیک گبه لیییندن
دوغولان یادداشیق :
سن ،
منیم بیرینجی یاریم
منسه ،
ایکینجی لره باغلانمیش یارین !
سؤیله جانیم
آرامیزدان
تانری لار
یوخسا آرازلار
کئچدیمی ؟
بؤلوشدوک بوتونلویوموزو بیز
یوخلوق قدر اوجوزجاسینا !
من
صیفیردان سونراکی یوخسوللوق لاری باشلادیم ،
سن
صیفیردان اؤنجه کی وارلیق لاری بوسبوتون . . .
. . . آنجاق!
اینان! . . .
گؤوده میز
ساری ایلان لار اوچون
یاشیل لیق بئجریلمه دن ،
بیرلیییمیز
یوخلوق لارا ایچیریلمه دن ،
صیفیردا گؤروشه جه ییک . . .
2 - سييانور آرزيلاري
کئچن ایل بو چاغلار
ماسان اوزه رینده
آلدین سییانور آرزی لارین
تک – تک ایچینه .
الین زویوبده ،
بانکا بالیغین
سوچلادین دنیزلییینه .
سن، بئله
چاغریلمامیش قوناق اولدون
توپراق تویونا.
سن ، بئله
ایذین دیلنمه دین
گئجه ایچمه سینه
قارانلیق قوسماسینا.
سن
بیر
ایکی
دؤرد یوخودایکن
اوچ
اوچوش . . . !
تانری پازئلینین بیریسی یوخموش، یعنی
سن قوسارکن
تانری آپ – آغ قایتاریلدی یئرینه
ائرلیک سه قیپ – قیرمیزی
کؤپوک لندی
بویویوب ، لخته لندی ؛
تانری بئله گئتدی اؤزونه
ائرلیییین هله منده
سوزورم سییانور اوره ییمه .
کئچن ایل بو چاغلار
ماسان آلتیندا
بیر سییانور
آرزی لاریلا بیر
توزا دؤزموش
اؤزلم لرین اؤلوم یئمی اولموش ،
قوت سوز
بؤجک سیز ال لر گؤزله ییر .
منده تانرینی
او قیرمیز نئونلو ماغازالارین
ویترین لرینه
قایتارماق ایسته ییرم .
آما ائرلیییمی بیریسینه تاپشیرمادان ، بئله .
منی بیر کز بئله آرامایین
من ،
بیر
ایکی
دؤرد یوخودایکن
اوچ
اوچوش
یعنی ، تانری پازئلینین ایکیسی یوخموش . . . !
*************
محمد قضایی
گؤزونو بیرجه یول آچدینسا منه
سانکی بیر عؤمرون چیسکین عذابی
او سون باخیشیندا یاغدی اوزومه.
قورویوب آغیر بیر هیکله دؤندوم
دالدیم گؤزلرینین ده رینلییینه
اون – آلتی یاشینین تهله که لری
بیر آ ندا جالاندی چییین لریمه
بیلمیرم سن ایدین یوخسا گوناهین
دؤیدو اوره ییمین تاختا قاپی سین
«قاپ دؤین » دئمه یه قالخدیم آیاغا
بیر اوشاق دایانیب قاپی دالیندا
الینده اون – آلتی اؤلومجول چیچک
«بونلاری اوخوماق ایستیرم»، دئیه
وئردی ال لریمه او چیچک لری
باخدیمسا اوشاغی گؤرمه دیم داها
نه قدر آختاردیم یوخودو اوشاق
نه بیلیم بلکه ده او چیچک لری
مینم طالعیمده اوخودو اوشاق
*
سنین طالعینده اوشاق کیمی ایدی
معصوم – بویاسیز ،
گؤزلرین دانیشان ناغیل کیمی ایدی
اون – آلتی چیچه یین اون – آلتی ایلی
هر چیچک بیر ایلین خاطیره سی ایدی
سن اؤز عذابینی – اؤز حسرتینی
هئچ اسیرگه مه دین بو چیچک لره
چیلپاق آغاج لارین اوره ک قانیله
دویوردون بو کؤرپه خاطیره لری
********
ایندیسه کؤچورم ، کؤچورم سندن
گئدیرم زامان سرحدلرینه
بیر طرفده سن – سن ؛ بیر طرفده من
بیتیر قارشیمیزدا بیر عؤمور نیسگیل
اَل چاتماز الوروق بیر- بیریمیزه
ایندی نه دئییم؟ ، نه دئییم؟ نه لر !
او سون باخیشی نین آغیرلیغینی
مندن سونرا بو گون کیم چکه بیلر ؟
سن منه باخدیقدا من جومدوم سنه
منیم چون دوغمایدی سنین ال لرین
منده چیرپینیردی سئوینجین ، غمین
منده چاغلاییردی هیجان لارین
بو گون سن گئدیرسن ، لچه ییمده دیر
دوداغیندان قالان سئوگی ایزلری
هئچ آغلاماییرام ، گؤزلریم کیمی!
کدرلی دئییلم اوره ییم کیمی !
هله سولمامیشام نیفرت بویاقلی
پاییزدان آسیلان طالعیم کیمی !
تبریز – 6/4/78
ـــــــــــــــــــــــــــــــــــــــــــــــــــــــــــــــــــــــــــــــــــــــ
حسن اومود اوغلو
سکوتا بورونوب یوللارلا آنلار
گؤی لرده ساللاییب قاشین قاباغین
گؤزومه باغلی دیر سنین آیاغین
اوخلانیب گؤزومه گؤزلرین سنین
باخیشین جالاییر کؤنلومه سازاق
آیریلیق ناغیلین اوخویورام من
هر کیپریک چالاندا دؤنور بیر واراق
جومو.رام کؤنلونه آی دنیز گؤزلوم
کؤنلون دالغالانیب چاغلاییر منی
آدیمی سیلیرسن بو گون بختیمدن
گؤزلر داملا – داملا آغلاییر منی
بو گون سن گئدیرسن کدیرلییم من
دونوبدور آغزیمدا هاراییم- سؤزوم
یوخ ! یوخ ! آغلاماییر دالینجا سنین
اوغور اولسون دئیه سو سپیر گؤزوم
نه واختسیز کؤچورسن سونقور باخیشلیم
هاچان یازدا کؤچوب گؤللرین قازی
آی ایپک قاناد لیم سن کی عمورلوک
قاییتماز اولورسان، نئیلیرم یازی ؟!
داشلاردا آغلاییر ویداع مارشینا
یول لاردا دوشونوب سون نییتینی
آیاقلا آرزیمی خوش گونه قووش
ایسته رم دونیادا سعادتینی
دئمیشدیم آنانا : " سئودیییم گؤزه ل !
سیزین قیزینیز دیر" منیم اولاجاق
بیلمزدیم ساچین تک باختیم قارادی
آرزی چیچک لریم بیر گون سولاجاق
منیمسه بختیمدن بئله گلیبدیر
هئچ آلوو بئله جه منی یاخمادی
اوچدو آرزی لاریم تیکدیییم بینا
ییخیلمیش تاواندان توزدا قالخمادی
گئتدین بخت ائوینه یولون اوغورلو
ضن ائتمه اؤز الیم ، اؤز باشیم اولدو
گئتدین می؟ حیاتین اوغوللو – قیزلی
منیمسه سیر داشیم ، گؤز یاشیم اولدو
گوز یاشیم جواهیر گوز یاشیم اینجی
دایان! گئتمه دایان دردینی آلیم!
آغارمیش ساچیمین ساپینا دوزوب
بو سون یادیگاری بوینونا سالیم
آتالار دئییرلر حیاتین یولو
یاری قسمت اولسا -یاری همت دیر
اولدوقجا چالیشدیم ، چاتمادیم سنه
خوشبخت اول گؤزه لیم بودا قیسمت دیر
یاخشی یول دئییرم تیترک دوداقلا
لاکین آرزیم عشقسم دومانا دونور
س.ز لریم آسانجا قوپور دیلیمدن
آنجاق! گؤروشوموز گومانا دؤنور
کؤکسومده قیزیلدان بیر سارای سالدیم
یاشارسان عؤمورلوک دیله ییمده ، سن
گؤزومدن گئتسن ده اوزاق دئییلسن
رویالاریمداسان اوره ییمده سن
تبریز - 1377
ــــــــــــــــــــــــــــــــــــــــــــــــــــــــــــــــــــــــــــــــ
صالح سجادی
بیلمیرم زامانی نئجه سوورسان
منه عقربه لر عقرب اولوب
صاباحیم قاییدیب اولوب دونه نیم
بو گونوم گونش چیخمامیش قورتولوب
قوی سنین پنجره ن ایشیغا باخسین
منیم پنجره می گئجه بورویوب
او سرین سولاردان اوزاق دوشموشم
تیکانلیقدا جاوان جانیم چورویوب
الی دولو گلدیم بوشالدی الیم
اوریی بوش گلدیم دولدو اورییم
من یاشیل گوله ردیم قارا آغلادیم
دمیر مئشه سینده سولدو اورییم
آه بو خیاوانلار بو اتوبوسلار
نئچه ایل اوزیله منی سورویوب
قوی سنی تبریزین چنی بوروسون
تهرانین توستوسی منی بورویوب
بیلمیرم بیلیرسن یا یوخ بورادا
دوستاق لارین آدی آپارتوماندیر
بیلمیرم بیلیرسن یا یوخ بورادا
آزادلیق تکجه بیر شولوق مئیداندیر
توتقون بیر گئجه دیر ایچیمه دولور
بیر ایستیکان تبریز بیر ایستیکان سن
شهریمین یوز ایللیک قان لارینا تای
تهرانین بئینینده قایناییرام من
آیاق اوسته اؤلن آغاج لارا تای
اولسمده شاهیداول ییخیلمامیشام
بو شهرین ایچی بوش قولچاق لارینا
روحونا آند اولسون ورولمامیشام
بیلمیرم زامانی نئجه سووورسان
من صاباحا چیخسام سوینه جه یم
بالیق تک شوشه می سیندیربب سونرا
دنیزیمه طرف سورونه جه یم .
************
«محمدرضا لوایی»
سنی دوشونمک بیر آز زور
میلچک قانادینا یوکلدیک گؤی لری
قارتال دیمدیییندن ساللادیق تورپاغی
سن سئوگینی زهرله دین یاغی
سنی دوشونمک بیر آز زور
خیاوانلار آددیملارینی سورماقدا
خیاوانلار اینک کیمی گؤیشه ییرلر بیزی
اود پارچاسی دیر هامی
اودون هاواسی دیر هامی
بویور ، اوره ییم آلیشیق
منی بویور اینسانلارا
منی بویور آزادلیغا، دارا
بیریسی بو گئجه اؤلجک دیر
حیات آغاجینی داللاندیقجا، گؤزه ل
بو گئجه بیریسی . . .
کروان یوللاندیقجا گؤزه ل
بو گئجه ده، گونشی
باشا چکیب یاتدیم
کؤلگه می شر یاخماسین قاپینیزا، دئدیم!
سئوگی گؤزه ل اؤیره تمن دیر
باخ، باخ
گونش یانی اوره ییم یاندی
دنیز یانی اوره ییم سولاندی
بو گئجه ده، بیردن
سؤزجوک لری سویوندوق شئعردن
منجه جئیران یئریشی دیر یاشام
شاعیر ته له، شاعیر تور
سنی دوشونمک بیر آز زور
بویور
باتی، پورتاغال سویودور
گئجه لریم بیر زنبیل خورما
گوندوزلریم دوندورما
ات- قان اولسون جانینا
چوخداندیر تانرینی حامیله سن گیله م
چوخداندیر اؤلورم
سنی دوشونمک زور دئییل کی
سنی دوشونمک بیر آز زور
_______________________________________-
«دومان اردم»
آغزيندان چيخان قانلی بؤجک لری
دوی!
گؤر گؤزلرينده کی ياشلی هؤرومجک لری
حيس ائت!. . .
بورنونون پرره لرينی جيريب زورلا چيخان ايلان لاری
قورخما. . .
ايره نمه ، ساقين ها!. . .
بونلاری سن تؤره تدين قانجيق بطنينده
هه له ده ياشاييرسان ميندار بدنينده!
کيرپيک لرينی يولما. . .
آغزينی قاپاتما. . .
بورنونا سومگو باتيرما. . .
ساقين ها!. . .
اونلاری اؤلدوره بيلمزسن! ،
اؤزونوده! ؛
اونلار ياشاياجاق سنينله ،
اؤلومونو دوشونمه ،
اؤلوم داها چوخ ايره نير، سندن!
سن ياشاياجاق سان ، یازيق! . . .
« بير دونيا پوخ ايچينده».
_____________________________________
"یونوس بالیغی"
«یونیس صفدری»
سني سئل لرين آغزيندان
،آلاجاغديم لاپ
بیر دولفین کیمی ، آما
قاپساندیم دورغون گؤل لره،
بیر دنیز اولدوزو کیمی
یاندی گؤزلریمین ایچی هر گون
یاندی اوره ییمین ایچی هرآخشام...
آکواریوم لارا سؤیکه دیم اوزومو،
گؤوده م ده یدی جاملارا...
سنی سئل لرین آغزیندان آلانمادیم
آه ... باغیشلا آنا...
بیر گول دسته سی کیمی
سوووردوم گئتدین سویا...
من آیا عاشیق پنجره لرده
سنسه سئل لره
آما ، آما...
آنام سولار آخاجاق بیر گون
زامانلار بویدا سولار.
منی ایچینده بولاجاقسان یئنه
بیر کؤرپه بالیق کیمی !
بیر کؤرپه بالیق کیمی
دوغولاجاق یوخولار...
آما دنیزلییینی قورویاجاغام بیر داها گره ک.
بیر دنیز اولدوزو کیمی
یاناجاغام باغریندا ببک-ببک...
یاندی گؤزلریم بئله جه
پنجره لر آرديندا آنا.
آیا باخدیم اولدوز گؤزلریمله
سن یوخدون آنا یانیمدا...
سنی سولار داشیدی گئتدین
منسه هر گئجه چکیلیره م آیا...
اینان کی فرعون لار بئله
آنمادان ایکیمیزی آنا
بیرسبد ده اوتوروب
بوتون نیل لری ییرتا - ییرتا ،
اویا-اویا
سنین بطنینه دولا- دولا قاییداجاغام
و بیر حیات چیچه یی کیمی
آلاجاغام سئل لرده ن سني ...
گنج لیییم یانسادا
اولدوز تک فیرتینالاردا ،
اینفارکت لارا ، دنیز اوغرولارینا
یئییلسمده ، اودولسامدا !!!
بیر گون سنی
سئل لرین آغزیندان آلاجاغام گولوم ،
اینان!
آنام... آنام...گله جه یم ...
سنه دوغرو گله جه یم ...
اینان... اینان...
"بیر یونوس بالیغی تک..."
__________________________________
"اوستا"
«ایبراهیم صدری»
- اوغلوم :
13 – 14 آناهتاری1 وئر
- آل اوستا.
- اوغلوم :
یات موتورون آلتیندا
نه سی وار بیر باکی وئر .
- اولور اوستا .
- اوغلوم :
اییی سیخ جیواتایی2
سونرا صاحیبینه دَر.
- سیخیرام اوستا
بیله ییم یئتدییینجه
اوره ییم یئتدییینجه
سیخیرام ایشته .
- اوغلوم :
ته رله میش سن
آخماسین ته رین موتورا
موتور پاس یاپار سونرا .
- ته ر پاس یاپارمی ؟
گؤز یاشی پاس یاپارمی ؟
- اوغلوم:
نه دئییرسن! باخ ایشینه .
- باخیرام اوستا ،
یالنیز ال لریم، ال لریم چاتلامیش به! اوستا
ال لریم آجی ایچینده ، اوره ییم وار ال لریمده ؛
اوره ییم یانیر اوستا ، قان ته ر ایچینده .
هم اوستا ،
سن هیچ میسکئت3 اوینادینمی سوخاقدا ؟
قیرمیزی کافئ دفترلرین وارمییدی ؟
هیچ گیتدین می اوخولا ؟
اوخول ناسیل بیر شئی یا اوستا ؟
اؤیره تمن ناسیل بیریسی ؟
اورادادا موتورا باخدیریرلارمی کی !
اورادادا سؤوه رلرمی چوجوق لارا ؟
اورادادا دؤوه رلرمی به ! اوستا ؟
- اوغلوم :
باخ ایشینه ، قیزدیرما منی !
- اولور اوستا .
آ . . . اوستا :
سنین ده آنان ساچ لارینا اوخشارمییدی ؟
سنه آغلارمییدی گئجه نین آل یالازیندا4 ؟
ساهی5! اوستا ؛
سن هئچ آغلادین می ؟
بیر صاباح جانسیز دوشنده آنان یاواشجا گؤزلری نین اؤنونده ! .
- اوغلوم:
باخ ایشینه ،
آتدیرما ته پمی !
گیر موتورون آلتینا .
- اوستا قیزما ،
باخ ! گیریرم موتورون آلتینا ،
دونیانین آلتینا گیریرم اوستا ،
دونیانین آلتینا گیریرم ،
دسته یه گرک یوخ ! اوستا
دسته یه گرک یوخ !
من اورایا اوره ییمی قویورام
اینان!
اینان!
داشیر اوستا . . .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
1) بیر کیلیدی آچیب – باغلاماق ایچین قولانیلان آلت ، آچار ، آچکی
2) بیر – بیرینه باغلانماق ایسته نیلن آغاج و یا دمیر پارچالارین ، حاضیرلانمیش اولان ده لیک لریندن گئچیریلرک ، اوجونا سومون تاخیلیب سیخیشدیریلان ایری باشلی مؤهره .
3) بیر جور اوشاق اویونو .
4) یالازا : آلوو آنلامیندادیر .
5) گئرچک دن : ساهی ، دئدیک لری قدر گؤزه لمیش! – سیز اونو گؤرمه دینیزمی ساهی!
